ئەکرەم جەمۆ: بۆ بنیاتنانى ئاشتى، عێراق دەبێ هەنگاوەکانى کوردستان هەڵبگرێ

ئەمڕۆ لە هەولێر وۆرکشۆپى هەمەلایەنەى "بەرەو ستراتیژیەتى نیشتمانى بۆ گەنجان و ئاشتى و ئاسایش لە عێراق" بەڕێوەچوو کە لەلایەن UNFPA و FBA رێکخرابوو.

 

ئەکرەم محەمەد جەمۆ سەرۆکى فەرمانگەى رێکخراوە ناحکومییەکان لە وۆرکشۆپەکەدا وتەیەکى پێشکەشکرد و تیشکى خستە سەر ژینگەى پێکەوەژیانى ئاشتیانەى کوردستان کرد کە لە دێرزەمانەوە تا ئێستا بەردەوامە و ئێمە شانازى دەکەین کە بەشێکین لەو خێزانە گەورەى کوردستان کە بەیەکەوە گونجاوین و بەیەکەوە دەژین و یەکترقبوڵکردن و بەیەکەوە ژیان بنەماى کۆمەڵگە کوردستانە و ئێمە بووینەتە ڕەمزى ئاشتیانە و بەیەکەوەژیان لە ناوچەى ڕۆژهەڵاتى ناوین.

گوتیشى: رێکخراوەکانى کوردستان کە لە بوارەکانى بەیەکەوەژیان و بنیاتنانى ئاشتى کاردەکەن رێژەیەکى باش و چالاکییەکى زۆر و کاریگەرییەکى ئیجابی دڵخۆشکەریان هەیە.

هەروەها گوتى: حکومەتى هەرێمى کوردستان پشتیوانى و پشتگیرى هەموو جۆرە دەستپێشخەرییەک دەکات کە ببێتە بەشێک لە هاریکاریکردنى گەنجان و بەیەکەوەژیان و بونیاتنانى ئاشتى، و ئاماژە بە هێڵە گشتییەکانى کابینەى نۆیەم کە تێیدا هاتووە: "پێداگری لەو پێکەوە ژیانە ئاشتیانەی نێوان پێکهاتە نەتەوەیی و ئایینیەکانی ناو هەرێمی کوردستان لە کورد و تورکمان و کلدان و ئاشوری و سریانی و ئەرمەنی و عەرەب و موسوڵمان و ئێزدی و مەسیحی وکاکەیی و مەندایی و زەردەشتی دەکەینەوە و ئەو تایبەتمەندییەی هەرێم دەپارێزین و بەهێزتری دەکەین".

لە کۆتاییشدا ئاماژەى بۆ چارەسەرەکان کرد کە کۆمەڵگەى عێراقى پێویستى پێیەتى بۆ یەکتر قبوڵکردن و بنیاتنانى ئاشتى و گرنگیدان بە گەنجان و گوتیشى عێراق پێویستى بە بەرجەستەکردنى ئاشتى ڕاستەقینە و یەکترقوڵکردن هەیە، لەکاتێدا نەبوونى بنەماکانى ئاشتى ڕێگربووە لە بەرەوپێشچوونى عێراق و بەڵکو عێراق و گەلى عێراقى بەرەو دوواوە بردووە.

لە وۆرکشۆپەکەدا سەرۆکى فەرمانگەى رێکخراوە ناحکومییەکانى عێراق و نوێنەرى وەزارەتى وەرزش و گەنجانى عێراقى و نوێنەرى UNFPA و FBA ژمارەیەک لە بەرپرسانى حکومى و رێکخراوەکان تێیدا بەشدارییان کرد.